სამარხვო კერძების გემრიელი რეცეპტები

პეტრე-პავლობის მარხვის კერძები

პეტრე-პავლობის მარხვა ერთ-ერთი მნიშვნელოვანი და მრავალდღიანი მარხვაა მართლმადიდებლურ ტრადიციაში, რომელიც წმინდა მოციქულების, პეტრესა და პავლეს ხსენებას უკავშირდება.

მარხვის ეს პერიოდი გამოირჩევა მსუბუქი და მრავალფეროვანი სამარხვო კერძებით, რომლებიც იდეალურად ერგება როგორც ჯანსაღი კვების პრინციპებს, ასევე ტრადიციულ გემოვნებას.

გიზიარებთ სპეციალურად შერჩეულ სამარხვო კერძებს, რომლებიც შეგიძლიათ პეტრე-პავლობის მარხვის პერიოდში მოამზადოთ.

სამარხვო თაფლაკვერი

არომატული და ნაზი სამარხვო დესერტი, რომელიც მზადდება ნატურალური თაფლით, დარიჩინით და მცენარეული ინგრედიენტებით. თაფლაკვერი გამოირჩევა სასიამოვნო ტექსტურით, ზომიერი სიტკბოთი და საოცარი არომატით. ის შეგიძლიათ მიირთვათ ჩაისთან ან ყავასთან ერთად.

ინგრედიენტები:

• 120 გ ხორბლის ფქვილი
• 50 გ თაფლი
• 30 გ შაქარი
• 20 გ მცენარეული ზეთი
• 25 მლ ცივი წყალი
• 2 გ დარიჩინი
• 2 გ სოდა
• 1 გ ვანილი

მომზადების წესი:

1. პატარა ქვაბში შეურიეთ წყალი, თაფლი და შაქარი. გაათბეთ დაბალ ცეცხლზე შაქრის სრულად გახსნამდე.
2. დაუმატეთ მცენარეული ზეთი და კარგად აურიეთ.
3. ცალკე ჯამში აურიეთ ფქვილი, სოდა, დარიჩინი და ვანილი.
4. თხევადი მასა თანდათანობით შეურიეთ მშრალ ინგრედიენტებს და მოზილეთ რბილი, ერთგვაროვანი ცომი. გააჩერეთ 15 წუთით.
5. გააბრტყელეთ დაახლოებით 1 სმ სისქეზე და გამოჭერით სასურველი ფორმები.
6. გამოაცხვეთ 180°C-მდე გახურებულ ღუმელში 12–15 წუთის განმავლობაში.
7. გააგრილეთ და სურვილისამებრ მორთეთ თაფლით ან შაქრის პუდრით.

მუხუდოსა და ქლიავის ჩირის ტაჯინი

მუხუდოსა და ქლიავის ჩირის ტაჯინი აღმოსავლური სამზარეულოს შთაგონებით შექმნილი კერძია, სადაც მუხუდოს ნაზი ტექსტურა, ქლიავის ჩირის მოტკბო გემო და არომატული სანელებლები ჰარმონიულად ერწყმის ერთმანეთს. ეს გამორჩეული კერძი განსაკუთრებულ ელფერს სძენს როგორც სამარხვო მენიუს, ისე სადღესასწაულო სუფრას.

ინგრედიენტები:

• 120 გ მუხუდო, მშრალი
• 50 გ ქლიავის ჩირი
• 30 გ ნიგოზი
• 1 ცალი ხახვი
• ზეითუნის ზეთი
• 200 მლ წყალი
• 1.5 ჩაის კოვზი მარილი
• ¼ ჩაის კოვზი შავი პილპილი
• ½ ჩაის კოვზი დაფქული ქინძი
• დარიჩინი სურვილისამებრ

მომზადების წესი:

1. მუხუდო კარგად გარეცხეთ, დაალბეთ 8–12 საათით და შემდეგ მოხარშეთ დარბილებამდე. მოხარშვის შემდეგ გადაწურეთ და გვერდზე გადადგით.
2. ხახვი წვრილად დაჭერით და მცენარეულ ზეთში მოშუშეთ საშუალო ცეცხლზე რამდენიმე წუთის განმავლობაში, სანამ დარბილდება და ოდნავ ოქროსფერ შეფერილობას მიიღებს.
3. მოშუშულ ხახვს დაუმატეთ მოხარშული მუხუდო, ქლიავის ჩირი, მარილი და სანელებლები. ინგრედიენტები კარგად მოურიეთ.
4. დაასხით წყალი და დაახურეთ თავსახური. ხარშეთ დაბალ ცეცხლზე 10–15 წუთის განმავლობაში, რათა ქლიავის ჩირი დარბილდეს და კერძი უფრო არომატული გახდეს.
5. ბოლოს დაუმატეთ დაჭრილი ნიგოზი და ფრთხილად მოურიეთ. გააჩერეთ ცეცხლზე კიდევ 2–3 წუთით, შემდეგ გადმოდგით და მიირთვით ცხლად.

წითელი ოსპის კრემ-სუპი ქეშიუთი

ნაზი ტექსტურის, კრემოვანი და არომატული სამარხვო წვნიანი, რომელიც აერთიანებს წითელი ოსპის მსუბუქ გემოს და ქეშიუს სირბილეს. იდეალური არჩევანია როგორც მსუბუქი სადილისთვის, ასევე ჯანსაღი კვების მენიუსთვის.

ინგრედიენტები:

• 150 გ წითელი ოსპი
• 1 ცალი ხახვი, საშუალო თავი
• 70 გ სტაფილო
• 2 კბილი ნიორი
• 40 გ ქეშიუ
• 20 მლ მცენარეული ზეთი
• 700 მლ წყალი ან ბოსტნეულის ბულიონი
• 20 გ პომიდვრის პასტა
• 2 გ კურკუმა
• 2 გ დაფქული ქინძი
• 2 გ პაპრიკა
• მარილი გემოვნებით
• შავი პილპილი გემოვნებით
• 10 მლ ლიმონის წვენი

მომზადების წესი:

1. ქვაბში გააცხელეთ მცენარეული ზეთი და მოშუშეთ წვრილად დაჭრილი ხახვი და სტაფილო 4–5 წუთის განმავლობაში.
2. დაუმატეთ ნიორი და სანელებლები: კურკუმა, ქინძი და პაპრიკა. მსუბუქად გააცხელეთ არომატის გამოსავლენად.
3. ჩაამატეთ წითელი ოსპი და კარგად აურიეთ.
4. დაასხით წყალი ან ბულიონი და ხარშეთ საშუალო ცეცხლზე 18–20 წუთი, სანამ ოსპი არ დარბილდება.
5. დაუმატეთ ქეშიუ და გააგრძელეთ ხარშვა კიდევ 5 წუთით.
6. სუპი დააბლენდერეთ ერთგვაროვანი, კრემოვანი კონსისტენციის მიღებამდე.
7. სურვილისამებრ მოაყარეთ მარილი, პილპილი და დაუმატეთ ცოტაოდენი ლიმონის წვენი. შეგიძლიათ მორთოთ ქეშიუს მარცვლებით ან მწვანილით.

ფისტისა და გარგარის ჩირის პილაფი

ბასმატის ბრინჯით, გარგარის ჩირითა და ხრაშუნა ფისტით მომზადებული სამარხვო პილაფი აღმოსავლური გემოების დახვეწილ კომბინაციას ქმნის. არომატული სუნელები, მოტკბო-მომჟავო ნოტები და მსუბუქი ტექსტურა ამ კერძს განსაკუთრებულ ხასიათს სძენს და სამარხვო მენიუს უფრო მრავალფეროვანს ხდის.

ინგრედიენტები:

• 160 გ ბასმატი ბრინჯი
• 1 ცალი ხახვი, საშუალო თავი
• 2 კბილი ნიორი
• 60 გ გარგარის ჩირი
• 40 გ ფისტა, გარჩეული
• 25 გ ზეითუნის ზეთი
• 350 მლ წყალი ან ბოსტნეულის ბულიონი
• 1 გ დარიჩინი
• 2 გ კურკუმა
• 1 გ კარდამონი
• მარილი გემოვნებით
• შავი პილპილი გემოვნებით

მომზადების წესი:

1. ბრინჯი გარეცხეთ ცივი წყლით 2–3-ჯერ და გააჩერეთ 10 წუთით.
2. ტაფაზე გააცხელეთ მცენარეული ზეთი და მოშუშეთ დაჭრილი ხახვი 3–4 წუთი.
3. დაუმატეთ ნიორი და სანელებლები: კურკუმა, დარიჩინი და კარდამონი. მსუბუქად გააცხელეთ არომატის გამოსავლენად.
4. დაუმატეთ გარგარის ჩირი და ფისტა. აურიეთ 1–2 წუთი.
5. დაუმატეთ ბრინჯი და კარგად შეურიეთ ყველა ინგრედიენტს.
6. დაასხით ბულიონი ან წყალი, მოაყარეთ მარილი და ხარშეთ დაბალ ცეცხლზე 15–18 წუთი, სანამ ბრინჯი სრულად არ მომზადდება.
7. ცეცხლიდან გადმოდგით და გააჩერეთ დახურული სახურავით 5–7 წუთი.
8. სერვირებისას შეგიძლიათ მოაყაროთ დამატებითი ფისტა ან ახალი მწვანილი.

კუსკუსი ბოსტნეულით

ეს არის სამარხვო, მსუბუქი, ნოყიერი და ჯანსაღი სალათი, რომელიც აერთიანებს კუსკუსს და ფერად ბოსტნეულს. იდეალურია მათთვის, ვინც ჯანსაღად იკვებება.

ინგრედიენტები:

• • 100 გ კუსკუსი

• 2 კიტრი
• 2 ბულგარული წიწაკა
• 2 პომიდორი
• 2 მწვანე ხახვი
• ზეითუნის ზეთი
• მარილი გემოვნებით

მომზადების წესი:

1. კუსკუსი მოათავსეთ ფინჯანში, დაასხით ადუღებული წყალი და რამდენიმე წუთი დაელოდეთ მის გაფუებას. როდესაც კუსკუსი სრულად შეიწოვს წყალს, ამოურიეთ და გააციეთ.
2. ამ დროს მოამზადეთ ბოსტნეული: დაჭერით კიტრი, პომიდორი და ბულგარული წიწაკა საშუალო ზომის კუბიკებად, ხოლო მწვანე ხახვი — წვრილად.
3. ცივ კუსკუსს დაუმატეთ დაჭრილი ბოსტნეული, ამოურიეთ და გააჩერეთ 2–3 წუთი.
4. მოაყარეთ მარილი, მოასხით ზეითუნის ზეთი გემოვნებით და კიდევ გააჩერეთ 2–3 წუთი.
5. ბოლოს ყველაფერი კარგად აურიეთ და მაცივარში შეინახეთ 10–15 წუთი, რათა გემოები ერთმანეთს გაუჯდეს.

სამარხვო ინგრედიენტები შეგიძლიათ შეიძინოთ ონლაინ მაღაზიაში „ჩემი მარაგი“. ჩვენი კურიერი სასურველ პროდუქტს საქართველოს ნებისმიერ კუთხეში უფასო მიტანის სერვისით მოგართმევთ.